Netheimur Brynku

Hólí mólí maður...
Haldiði ekki að maður sé barasta á leiðinni í verkfall!! Ég kann það ekkert... Ætli maður fari í verkfallsvörslu? Á ég þá að mæta með kylfuna og reyna að koma í veg fyrir að kennarar mæti til vinnu í einkaskólum? Eða á ég að tölta niður Laugarveginn með kröfuspjöld!! 'Meiri laun fyrir minni vinnu!!' Eða á ég kannski bara að gera ekki neitt og bíða eftir því að samninganefndin ljúki sínum störfum og ég fái e-a 4 þúsund króna launahækkun fyrir enn meiri vinnu?
Ég bíð spennt eftir því hvað aðrir kennarar í skólanum ætla að gera... ég er að spá í að gera eins og þeir!!

Nú, víkjum að öðru... sem er meira að segja mun skemmtilegra umræðuefni! Kærastinn minn hann Jón Einar! Ég var að tala við Ellu Maju í kvöld og komst að því að stúlkan hafði ekki hugmynd um að undirrituð væri gengin út!!! Ja hérna hér... Nú, það tilkynnist hér með að ég á kærasta sem heitir Jón Einar og hann er alveg hreint dásamlegur maður...!

Og enn að öðru. Begga er búin að sitja hér í kvöld og borða með okkur. Hér var elduð dýrindis veislumáltíð á mexíkóska vísu... og það var einmitt umræddur kærasti sem eldaði! Ljómandi skemmtileg kvöldstund í frábærum félagskap.

En, nú er kominn háttatími fyrir mig því að það er jú síðasti kennsludagur fyrir boðað verkfall á morgun...

Ljómandi.. ljómandi.. ljómandi... Það er bara ekki hægt að lýsa því hvað hausttónleikarnir voru góðir þetta árið! Við Jón Einar buðum Beggu með okkur á þá... kominn tími til að hún uppgötvi Hörð Torfa! Þema tónleikanna voru Ælendingar!! Það eru yndislegar persónur eins og Karl R Emba og eiginkona hans Kven R Emba, Kalli kroppur og Somtæmer svo einhverjir séu nefndir til leiks! Yndislegt fólk að eigin mati! Þarna kynnti Hörður okkur m.a. fyrir stjórnarskrá Ælendinga sem er vægast sagt áhugaverð! Hún er eiginlega það áhugaverð að ég má til með að birta hana hér í heild sinni!

1. Allir eru asnar nema Ælendingar.
2. Allt er öðrum að kenna.
3. Enginn er klókari, betri eða vitrari en Ælendingur.
4. Ælendingur má gera og segja það sem honum sýnist þegar honum sýnist eins og honum sýnist.
5. Hver sá er gerir eitthvað annað en það sem Ælendingar vilja, eða gerir hlutina öðruvísi en Ælendingar kjósa, hefur gert sig seka(n) um refsiverða háttsemi og gildir þá einu hvort viðkomandi hafði hugmynd um vilja Ælendinga eður ei.
6. Þeim sem gengur vel og líður vel hlýtur að hafa stolið einhverju frá Ælendingi og skal refsað í samræmi við það.
7. Hver sá sem er stærri og meiri en Ælendingur á einhvern hátt skal umsvifa- og undantekningalaust smækkaður með öllum ráðum.
8. Öllum sem á einhvern hátt eru frábrugðnir Ælendingum í útliti og/eða hugsunarhætti skal vísað úr landi án tafar.
9. Ælendingur ákveður hvað er satt .
10. Þegar Ælendingur segir að hann sé ósýnilegur þá er hann það.
11. Ælendingur ræður alltaf, sama hvað hver segir og hversu margir kunna að segja það, enda kemur það málinu ekkert við.
12. Ælendingur er eyja og hefur þar af leiðandi ekki áhuga á öðrum en sjálfum sér.
13. Ælendingar fara alltaf stystu leiðina.
14. Ælendingur getur aldrei haft það svo gott að hann megi ekki kvarta.
15. Þeir sem ekki eru sáttir við stjórnarskrá Ælands eru ekki Ælendingar og ber því að fara eftir þessari löggjöf og virða hana í einu og öllu. Ælendingum er hins vegar frjálst að túlka hana eftir eigin höfði.
16. Nei, það eru engar mótsagnir í 15. grein. Asni.

Það hlýtur að vera yndislegt líf að vera Ælendingur!!