Netheimur Brynku

Það er svo mikið af skrýtnu fólki í Háskólanum!
Nú sit ég inni á Þjóðarbókhlöðu og ætla mér að læra dálítið í dag! Ég hef aðeins gert af því undanfarið að sitja hérna, bæði á námskeiði sem ég var á og svo til að læra. Í dag sem og aðra daga sem ég fer í skólann (til að læra, ekki kenna) er ég búin að sjá sama manninn! Það skiptir ekki máli hvort ég er í tímum úti í Odda eða hvort ég sit hér á Þjóðarbókhlöðunni, hann er alltaf hérna! Ég var m.a.s. í tímum hérna í þrígang um daginn og hann var hér alla dagana! Einn af þessum tímum var á mánudegi. Fyrr um daginn hafði ég verið í tíma úti í Odda og þá var hann þar!!
Merkilegt! Þetta er gráhærður maður með frekar lýjulegt hár, ljósum frakka með gleraugu. Hann er alltaf eitthvað að grúska með helling af blöðum fyrir framan sig eða undir hendinni!
Síðan er annar maður sem er hér líka öllum stundum. Hann hef ég líka séð úti í Odda að morgni til og síðan hér á Þjóðarbókhlöðunni seinna um daginn!
Fyrst þegar ég sá hann hélt ég að þarna væri kominn Gísli Súrsson því hann er bæði með sítt skegg og hár sem hefur sennilega ekki verið snyrt síðan elstu menn muna! Pant ekki mæta honum í myrkri!
Ég held hreinlega að lífskúnstnerarnir sem hefðu áður staðið á kössum niðri á Lækjartorgi og messað fyrir hönd Hjálpræðishersins séu allir hér á Þjóðarbókhlöðunni, svei mér þá bara!!
En... best að spá aðeins í það hvort launaþróun á Íslandi sé eðlileg!!

... er kominn á stjá aftur!

Já, ég tek heilshugar undir með ykkur kæru vinir! Þetta er einhver slakasta bloggframmistaða sem sögur fara af! Allavega af manneskju sem hefur ekki lýst því yfir að vera hætt að blogga!

Hmmm.. fréttir-fréttir...

Já, við hér á Völlunum erum formlega byrjuð á húsbyggingunni suður með sjó. Það er búið að grafa grunninn að húsinu, fylla hann af möl og nýjustu fréttir (alveg sjóðheitar) herma að svokölluð "fundament" verði steypt á morgun! Það eru óneitanlega góðar fréttir því það þýðir að þá er hægt að fara að vinna af alvöru í grunninum. Það er nefnilega heilmikið verk eftir áður en hægt verður að reisa einn einasta vegg! Allar lagnir, bæði rafmagns-, pípu- og skólplagnir verða lagðar áður en platan sjálf verður svo steypt. Þá standa bara blessaðar lagnirnar uppúr plötunni og virka ósköp ómerkilegar!
Nú, það er orðið opinbert á svo mörgum vígstöðvum að ég held að það hljóti að vera óhætt að nefna það hér líka að við JE eigum von á nýjum erfingja í mars! Þá ætlar fröken Camilla að verða stór systir... jafnvel þó svo okkur þyki hún bara ekkert stór! En.. hei.. hún er jú orðin rúmir 80 sentímetrar á hæð og kann að segja "datt"!! Það hlýtur að nægja í "stórusystrahlutverkið"... Svona allavega í bili!
Fleira...
Já, ég upplifði heimþrá í fyrsta sinn í næstum því heila mannsævi!! Ég fór með 7. bekknum sem ég er að kenna að Reykjum í Hrútafirði í heila VIKU!!! Það var ljómandi fínt... svona eins langt og það nær. En mömmuhjartað hafði óskaplega heimþrá þegar kvöldaði! Ég gat þó harkað af mér og þurfti ekki að sofa inni hjá samkennara mínum!!
Og blessaður skólinn... Ég er enn í náminu í HÍ þó svo að ég sinni því náttúrlega næstum því ekki neitt! Ég skrifaði eina ritgerð á meðan ég var að Reykjum um það hvernig sjálfstjórnarréttur sveitarfélaga og stjórnmál tengjast!! Það var mjög áhugavert.. svona ef frá er talin sú staðreynd að ég veit eiginlega ekkert í minn haus varðandi stjórnmál yfir höfuð! Ég vona allavega að blessaður bæjarstjórinn í Vogunum njóti lestursins þegar hann les blessaða ritgerðina! (Ég ætla ekki að senda honum hana bara si svona heldur vill það þannig til að hann kennir námskeiðið!!)
Þá á ég bara eftir að skrifa um það hvort launaþróun sé eðlileg á Íslandi! Það er til e-r hagfræðileg formúla fyrir það allt saman en það gagnast mér lítið ef ég get ekki vitnað í e-a fræðinga! Menn eru algerlega ritrýndir í Viðskipta- og hagfræðideildinni við HÍ! -Eins gott að þeir lesi ekki þetta bull sem hér birtist... Þetta verður seint talið ritrýnt!
Nú... ég fór austur á land að heimsækja hana systur mína. Það var ljómandi fín heimsókn sem teygði anga sína alla leið frá Bakkafirði og að Fáskrúðsfirði. Við systur gerðum víðreist og skoðuðum okkur heilmikið um. -Já... og ég fann m.a.s. "tínu" til að tína ber! -Þið vitið, ekki þessar sem eru eins og póstkassar í laginu heldur þessar með áfasta taupokanum! Þannig að við systur tíndum dálítið af berjum á milli þess sem við skoðuðum hið fagra austurland.

Og ég held hreinlega að þetta sé svona það helsta!! Hver veit, kannski ég fari að lifna við hér inni!!